Panteono

Edukado.net premie publikigas 10-15 novajn prezentojn de vivantaj instruistoj ĉiujare la 15an de decembro. Vi povas sendi proponojn ĉe la FORUMO.  

Al la komenco

Plena nomo: Probal Dasgupta
Edukado-ensalutnomo: probal
Vivtempo: 1953 - 2026
Devenlando: Barato
Prezento: Probal Dasgupta, n. 1953, e. 1967, emeritiĝis kiel profesoro pri lingvistiko en la Barata Statistika Instituto 2018; iĝis membro de la Akademio en 1983 (ĝia vicprez. 2001-2015, ĝia prez. 2016-19); estis prez. de UEA 2007-2013.

Pedagogiaj agadoj: verkis oklecionan elementan kurson bengallingvan felietone en Gyaan o Bigyaan 1985-86; instruis en la sanfranciska kursaro (la pra-NASK) apud David Jordan, 1978, en la barlastona kursaro apud Marjorie Boulton k.a., 1988, en la poznana kursaro apud Ilona Koutny k.a., 2009, 2016; lekciis por la amsterdama kursaro apud Federico Gobbo, 2016; membris en IEK (ĝia prez. 2006-07); membras en la scienca komitato de IPR; redaktis plenan bengallingvan E-lernilon Bishwobhasha Esperanto de Badal Sircar unuafoje (liapete) en la kajeroj kiujn li mem aperigis, kaj duafoje post lia morto kiam necesis kunmeti ilin kun lia Z-biografio en unu volumon (Kolkata: FEB, 2012); lingve mentoris plurajn baratanojn, el kiuj kelkaj nun reliefe rolas en la movado; surloke ekzamenis (IEK kaj KER) dum UK-oj; rajtigita ekzamenanto por KER.

Aliaj agadoj rekte ligitaj al Esperanto: aŭtoris pli ol ducent revuajn artikolojn kaj libroĉapitrojn en kaj pri Esperanto kaj esperantologio (plej grave por pedagogoj: Adverboj en Esperanto, Serta Gratulatoria in honorem Juan Regulo, vol. II:119-130, 1987; Apud la vorteroj: la vortila kromvojo, Abunda fonto: Memorlibro omaĝe al Prof. Istvan Szerdahelyi, 159-65, 2009; Du problemoj en la sintakso de Esperanto, Aliroj al Esperanto, 65-77, 2018); unu originalan libron, manifeston pri teoria esperantismo (Loĝi en homaj lingvoj: la substancisma perspektivo, 2011, aperinta samjare ankaŭ anglalingve, eldonite de la nacia filozofia konsilio kiu, nomumante lin tiujara honorprofesoro pri la filozofio, komisiis lin verki ĝin); plurajn beletrajn librojn tradukitajn al kaj pere de Esperanto. Juĝkomisionano (poezio) por la Belartaj Konkursoj 1978-1988. (Kun)redaktoro de LPLP 1990-2017. Kunredaktoro de Beletra Almanako jam de 2007.

Agadoj duonrekte ligitaj al Esperanto: gvidas skolon de lingvistika laborado, nomatan 'substancisma', kiu donas al iuj faktoj pri la lingvo Esperanto gravan rolon en la pedagogio pri kaj en la argumentado por tiu skolo (vidu precipe lian libron After Etymology: Towards a Substantivist Linguistics [kun Alan Ford kaj Rajendra Singh, 2000] kaj lian artikolon 'Postkuri' ne estas 'kuri post': Esperanto kaj la plenvorta morfologio [Aktoj, Esperantologia Konferenco, 2013]); prezentis tiun skolon, abunde reliefigante Esperanton kaj instruetante elementojn de Esperanto en la ekzemploj kaj ekzercoj, en kursmaterialo pri la elementa morfologia kaj sintaksa teorio ene de retkurso pri la ĝenerala lingvistiko: tiun kurson, Basic Morphology and Syntax, disponigas la ŝtata retkursejo en Barato ekde 2016.

Opinioj kaj komentoj

Entute komentoj: 5; | Aldoni propran komenton

5.
Monik je 2026-06-02 20:14:45

Kia ŝoko ! Mi havis la ŝancon veturigi lin- elstara esperantisto - de Torino al les Brenets ĉe Mirejo Grosjean por renkontiĝo kun aliaj esperantaj fakuloj ! ĝi estis speciala momento. Atente al la vilaĝoj kiujn ni trapasis,li petis halton kaj fotis la ardezajn tegmentojn de la Aosta Valo. Tre modesta, li montris multan empation por homoj ĉirkaù li. Li restos en mia koro.
Mi funebras kun la familio.
Monika 05

4.
espbib je 2026-06-02 16:51:25

Forlasis nin denove longjara amiko, vivanta en fora mondo, sed restanta nun en niaj koro kaj memoro. Mi funebras kun la familio kaj nia movado. Nome de la Germana E-Biblioteko en amikeco pli daŭrema ol niaj vivoj, Utho Maier

3.
ilonaesp je 2026-06-02 09:16:09

Ŝokis min la novaĵo pri la subita forpaso de Probal, ja antaŭ kelkaj tagoj ni korespondis pri lia artikolo por la anglalingva libro pri interlingvistiko kaj esperantologio. Li ĉiam estis helpema, kunlaborema, komprenema kaj havis profundajn konojn. Li dufoje gvidis lingvistikan kurson kadre de la Interlingvistikaj Studoj de AMU en Poznano, ĉe ni.
Esperantio perdis en lia persono gravan kontribuanton en la tereno de lingvistiko, literaturo, gvidanto de UEA kaj AdE.
Ripozu en paco!
Mi sincere kunsentas kun lia familio
Ilona

2.
anna_lowenstein je 2026-06-02 07:51:30

Kiel terura ŝoko hieraŭ matene ŝalti mian komputilon kaj legi la konsternan novaĵon, ke Probal mortis dum la nokto. Eĉ la antaŭan vesperon li ankoraŭ sendis mesaĝojn en Facebook. Mi konis lin ekde 1980, kiam ni ambaŭ laboris en la Centra Oficejo, kaj ni renkontiĝis multajn fojojn dum la postaj jaroj ĉe diversaj kongresoj. Mia ĉefa memoro pri li estas, ke li tute ne kapablis verki simple - li neniam povis skribi simplan frazon, se eblus kompliki ĝin! Kaj tamen tio estis ŝerco inter ni. Tiun trajton mi nun rerigardas kun nostalgio. Estas apenaŭ eble konvinki min pri lia malĉeesto.

1.
Sylvain je 2026-06-01 13:29:48

Kara Probal, min ĉiam kortuŝis via afabla aliro al kiu ajn, via modesto kaj via humuro, kiu interalie montriĝis en viaj multaj vortludoj en esperanto. Ankaŭ miajn francajn trovaĵetojn vi volonte frandis kaj tio donis al ni aldonan ludplacon. Vi mankas jam al mi, kara. Ripozu en ĝojo.

Kopirajto © 2001 - 2026 edukado.net. Ĉiuj rajtoj rezervitaj.
Funkciigita de Fondaĵo Edukado.net kunlabore kun E-dukati kaj ESF.