UEA-KER

Ekde decembro 2008 UEA funkciigas internacian ekzamensistemon de Esperanto, kiu konformas al la postuloj de la Konsilio de Eŭropo kaj difinas lingvokonajn normojn.

La unulingvaj ekzamenoj de UEA estis ellaboritaj laŭ la Komuna Eŭropa Referenckadro (KER) en niveloj B1, B2 kaj C1. La agnosko kaj funkciigo de la sistemo okazis kunlabore kun la Ŝtata Lingvoekzamena Centro (ORIGO) en Budapeŝto, kie Esperanto troviĝas inter la ŝtate rekonataj fremdaj lingvoj kaj kadre de ties ekzamensistemo havas la samajn rajtojn kiel la aliaj fremdaj lingvoj. Plurmil kandidatoj estas testataj ĉiujare en la menciitaj niveloj en la t.n. dulingva (hungara-Esperanta) versio de la lingvaj ekzamenoj.

La fakto, ke la nova ekzameno konstruiĝis baze de la eŭropaj normoj, signifas, ke ties atestilon oni oficiale agnoskas kaj traktas kiel la aliajn lingvoekzamenajn atestilojn.

En la sekcio Priskribo vi povas legi la detalan prezenton pri la postuloj kaj strukturo de la ekzameno.

Vi certe rimarkos, ke kompare kun la malnova ILEI-UEA-ekzamenoj en la novtipa ekzameno nur en la parola parto estas demandoj traktantaj la movadajn kaj kulturajn konojn pri Esperanto.

La nova ekzamensistemo estis lanĉita fine de 2008. Ĝis septembro 2022 okazis pli ol 80 sesioj en 32 landoj kun 2558 sukcesintoj. La partoprenintoj venis el 81 landoj.  La liston de la sukcesintoj vi povas trovi en nia fierlisto.  Pri la aktualaj ciferoj bv. konsulti la statistikan paĝon.

En la jaro 2021 la ekzamenkomisiono de UEA planis enkonduki novajn erojn en la ekzamensistemon, nome aldoni novan nivelon, la plej altan C2-ŝtupon kaj ebligi al la kandidatoj, loĝantaj dise en la mondo, ankaŭ el siaj hejmoj rete trapasi la ekzamenojn. Ene de edukado.net formiĝis teamo por ellabori la novan nivelon, ties postularon kaj modelajn testseriojn. La membroj de la C2-teamo estis la samaj kolegoj, kiuj dekomence agadis por la lanĉo kaj funkciigo de la unulingvaj ekzamenoj ĉe la budapeŝta ekzamencentro.  La tuta jaro 2021 pasis por tiuj laboroj. En julio, Katalin Kováts dum la Virtuala Kongreso en filmita prelego raportis pri la laborpaŝoj kaj en decembro 2021 kaj en januaro 2022 okazis la testado de la nova sistemo. Rezulte de la preparlaboroj ambaŭ novaĵoj enkonstruiĝis en la ekzamensistemon. 

En junio 2022 okazis la unuaj retaj ekzamenoj en niveloj B1, B2 kaj C1.

Samjare en aŭgusto dum la Universala Kongreso en Montrealo debutis la nova C2-nivelo. 

La sekva granda ekzamenevento estos la lasta semajnfino de novembro 2022, nome la 10a Tutmonda Ekzamentago, kun ĉeestaj, paperaj ekzamenoj en ĉiu nivelo, kaj reta ekzameno je C2-nivelo. Informojn pri la sesioj kaj aliĝilojn trovu ĉi tie:

Je ajna informbezono, bv. kontakti Katalin Kováts, la estron de la KER-Ekzamena Centro de UEA. 

 Nederlando, 31a de aŭgusto 2022.

Kopirajto © 2001 - 2022 edukado.net. Ĉiuj rajtoj rezervitaj.
Funkciigita de Fondaĵo Edukado.net kunlabore kun E-dukati, ESF kaj E@I.