Atestilo
Klarigoj pri la novaj KER-atestiloj kaj pri iliaj mendebloj
| Post sukcesa ekzameniĝo vi ricevos retpoŝte esperantlingvan atestilon, kiun vi mem povos presi. Por tiu versio vi ne devas aparte pagi. Vi povas havi (post aparta mendo) libroforman atestilon, se vi trapasis KER-ekzamenon en la jaro 2022 aŭ poste. La libroformaj atestiloj pretiĝas en du lingvoj. Dekstraflanke ĉiu ekzemplero havas esperantlingvan tekston kun ĉiuj informoj, kaj la maldekstra flanko povas havi nacilingvan tradukon en unu el la sekvaj lingvoj: angla (brita aŭ usona), ĉina, finna, franca, germana, hispana, hungara, itala, japana, korea, kroata, pola, portugala, rusa, slovaka, slovena kaj vjetnama. (Ni pretas produkti atestilojn ankaŭ en aliaj lingvoj, sed tiuokaze bv. helpi traduki aŭ proponi tradukhelpon.) La unulingvaj atestiloj en la maldekstra flanko ne havas tekston, sed jes ja havas fonan dezajnon. La atestiloj de la C2-sukcesintoj havas la subskribon ankaŭ de reprezentanto de la Akademio de Esperanto. Prezoj de la atestiloj: laŭplane la atestilojn oni povas mendi kaj pagi aliĝante al la ekzamenoj, en la sama formularo kontraŭ pliaj 8 eŭroj. Tial la ekzamenkotizoj jam dekomence estas en du formoj: sen aŭ kun la atestilo. Eblos mendi la dokumenton ankaŭ post la ekzameno, sed tiam la prezo estos pli alta (10 eŭroj) por kovri la plusajn administrajn kaj bankajn kostojn. |  |
| KER-Ekzamena Centro (KER-EC) klopodas plifaciligi la pagojn kaj la sendadon de la atestiloj, envolvante landajn asociojn kaj lokajn reprezentantojn en tiuj landoj, kie troviĝis pli ol 4 kandidatoj.   Por usonaj ekzameniĝintoj E-USA decidis pagi la kostojn de la atestiloj kaj la perpoŝtan sendadon. La samon decidis ankaŭ Esperanto-Asocio de Britio por britaj suckesintoj. La dezirantoj simple devas plenigi la formularon kaj ne bezonas pagi ion ajn. Dankon kaj gratulojn al E-USA kaj EAB pro tiu gesto kaj valora subteno de la ekzameniĝintoj kaj la KER-ekzamenoj. (Bona novaĵo, ke la slovena landa asocio agos same!) Mendebloj: por mendi atestilon necesas plengi formularon kun bonaj, ĝustaj datenoj! B1, B2, C1 kaj C2 kandidatoj plenigu tiun ĉi formularon. | Klaku al la tabelo por vidi en granda formato. |
| La menditajn atestilojn eblas ricevi poŝte aŭ persone en la loko, kiu estas indikita en la formularo de la koncerna jaro. Kiel pagi? (Legu pri tio en la mendilo.) Se vi mendas la atestilon ANTAŬ la ekzameno, la kostoj estos enkalkulitaj al via ekzamen-fakturo. Se vi mendas atestilon POST la ekzameniĝo, post la plenigo de la formularo, atendu, ke KER-EC konfirmu vian mendon kaj trovu la plej oportunan solvon por plenumi vian deziron. Ni indikos la pageblon (ĉu UEA-konton, ĉu enlandan kolektejon, ĉu uzon de PayPal aŭ de bankokarto ktp.) kaj vidante ĉiujn mendojn eventuale povos trovi por vi avantaĝan sendadon. |  |
