Novaĵoj
Modela enlerneja agado en Herzberg
Kategorio: Movado; Dato: 2015-03-04 10:12:07
Jen mallonga raporto pri oficialaj lernejaj Esperanto-kursoj en Herzberg am Harz - la Esperanto-urbo en 2015:
Baza lernejo 'Nicolai': 6-9-jaraj lernantoj lernas Esperanton en 60-minuta posttagmeza fakultativa kurso laŭ permeso de la federacilanda edukministerio de Malsupra Saksio (Landesschulbehörde Niedersachsen). Esperanto-leciono estas oficiala oferto de la lernejo enkadre de la tuttaga lernadprogramo.
Meza lernejo 'Oberschule': 10-18-jaraj lernantoj. Esperanto estas libere elektebla fakrondo (unu foje 45 minutoj/semajno).
Gimnazio 'Ernst-Moritz-Arndt': 10-18-jaraj lernantoj lernas Esperanton en 2x45-minuta posttagmeza kurso, kiu - same kiel la kurso en la baza lernejo - okazas laŭ la permeso de la federacilanda edukministerio.
La Gimnazio kaj la Esperanto-Societo Südharz subskribis kontrakton kaj ekde 01 februaro 2015 ili fariĝis kunlaborantaj partneroj por plenumi Esperanto-instruadon.
La kursojn en tiuj tri lernejoj gvidas Zsófia Kóródy (oficiala anstataŭanto estas Peter Zilvar). En ĉiuj lernejoj murtabuloj, afiŝoj, faldfolioj informas pri Esperanto.
Por la junaj lernantoj ni organizas foje-foje ekskursojn en la regiono kaj kunvenojn en la Esperanto-Centro.
Kun amikaj salutoj, Zsofia Korody
Noto: La redakcio gratulas la kolegojn en Herzberg, kaj speciale dankas ilin pro la registrado de la kursoj en nia KURSEJO.
| ← Pri la Verdaj Skoltoj kaj pri ilia PEKO | Al la listo | RISKO-novaĵoj kaj nova kampanjo en marto 2015 → |
