Panteono

Kara Eva, kvankam tre malofte ni renkontiĝis, mi sentas kvazaŭ perdon de granda amikino. Nia konatiĝo okazis en Odeso, 1998, kie mi, kun admiro, sekvis vian Cseh-metodan seminarion. Eleganta, amika, gaja kaj sprita, vi restos modelo en mia koro.

Elkoran kondolencon.

Nome de la nederlanda NGGE mi kore kondolencas la parencojn kaj kolegojn de la karmemora meritplena Ewa Bondar. Ŝia aktivado restos en nia memoro.
Rob Moerbeek.

El fora Aŭstralio sur ties plej seka ŝtato mi kondolencas.
Antaŭ precize dudek jaroj por studi la zamenhofan lingvon
kaj la porpacajn idealojn de la Movado mi pasigis tutan jaron en bela Pollando,
kies plej bela instruisto de la Cseh-metodo ja estis sincera Ewa. A kaj B kaj ni ĉiuj
ĵus perdis grandan animon - Adelajdo kaj Bialistoko adiauas. Paul Desailly.

Hodiaŭ mi adiaŭos Eva por ĉiam. Sed Ŝi ne lasos vakuon por si, restos multaj ŝiaj lernantoj, Ĉe-instruistioj, kiujn ŝi edukis kaj simplaj esperantistoj kiel mi, en kies memoro ŝi lasis neforgeseblan spuron. Ripozu en paco.

Al mi bonŝancis koni tiun-ĉi mirindan sinjorinon Eva Bondar.
Ŝi por mi estas idealo de esperantistino; bela, bona, sincera, amikema, kompetenta, fidinda.
Eva havis fortan karakteron kaj neforgeseblan ĉarmon. Mi neniam forgesos ŝian alvenon al “Aroma Jalto” por gvidi la seminarion “A” por eduko de Cseh-metodaj instruistoj, malsana kun la temperaturo 38 gradoj! Eva, dormu trankvile! Vi estis kaj estas la plej ĉarma sinjorino en la mondo!

Ewa restas en mia memoro agrabla homo kaj lerta esperantistino, kiu havis hejmon kun vasta esperanta libraro kaj belegajn florojn amatajn kaj flegatajn de ŝi. Miajn sincerajn kaj varmajn kondolencojn al la familianoj.

La nomo de Ewa Bondar porĉiame ligiĝas kun Cseh-metodo kaj ties aŭtoro, Andreo Cseh. Kiel admiranto de Cseh, mi respekte kliniĝas antaŭ la ĵus forpasinta instruistino kiu fariĝas senmortulino. Miajn kondolencojn al ŝia familio.

Kara Ewa,
Mi ne kondolencas vin, ĉar vi dormas pace, sed mi kondolencas ĉiujn viajn konatulojn, al kiuj vi certe multe mankas.
Restu modelo por ni ĉiuj. Mi plezure renkontis vin en Zagreb.
Ginette

Plenkorajn kondolencojn al la familianoj de mia kara Instruistino. Olha

Akceptu ankaŭ mian kondolencon.

Ewa restas en mia memoro kaj miaj koro tia kia ŝi estis: ĉarma, eleganta, trankvila kaj helpema!

Mi sincere kondolencas al la familianoj kaj asocianoj!

Plej bonaj homoj restos en niaj koroj por ĉiam.

Ewa Bondar partoprenis niajn naciajn ILEI-Konferencojn kaj talente kontribuis al ili. Ŝi estis diligenta kaj atentema membro de la pola sekcio de ILEI. Kortuŝa estas ŝia sindediĉo por E-o en diversaj medioj (i.a. la subtenado donata al la Studumo en Bydgoszcz), ĝis malfruaj vivjaroj. Brava persono, ŝi ne atentis la distancojn kaj foje sian sanstaton (iam kun forta febro ŝi faris longan eksterlandan vojaĝon por instrui...).
Ŝi meritas niajn dankajn pensojn.
Maria Majerczak

Mi adiaŭas vin kara Ewa,mi bedaŭras, ke ne eblos jam brakumi vin, renkonti. Tiom multe da bonkoreco mi ricevis de vi, Ewa.....dankon!

Ni konatiĝis en Grezijono, kie vi instruis dum tiutempaj 3 semajnaj staĝoj. Vi tie majstre instruis rektmetode kaj rektkaraktere sed ĉiam kun milda afabla rideto.
Ripozu en paco.
Edmond kaj Arlette Plutniak

Kun granda bedaŭro ni eksciis pri la hodiaŭa forpaso de Ewa. Nome de Bjalistoka Esperanto-Societo mi volas kore adiaŭi ŝin kaj danki por ĉio, kion ŝi faris por bjalistoka, podlaĥia, pollanda kaj internacia Esperantujo. Honoron al ŝia memoro!

Kara Ewa estas vere talenta instruistino, kiu instruas ne nur la lingvon, sed ankaŭ la manieron por vivi kaj agi!

Karega Eva, via neimageble gaja kaj amikeca kurso en Belorusio, kiun mi iam partoprenis, gravuriĝis sur mia memoro! Multajn kisojn al vi el Italujo! Tutanime via, Olha Vdovychenko.

Kara Eva, jam delonge mi ŝuldas la gratulvortojn pro la akiro de la distinga loko en la Panteono de edukado.net. Tio estis ankaŭ por mi la okazo rememori komunajn renkontiĝojn, dum kiuj vi radie feliĉis pro la formado de novaj lingvoadeptoj. Plej kore, Barbara Pietrzak