Novaĵoj
Novaĵoj pri la KER-ekzamenoj
Kategorio: Edukado; Dato: 2020-06-16 23:32:35
La Tutmonda Ekzameno, kiun ni planis por junio, bedaŭrinde ne povis okazi pro la pandemio.
Tamen meze de junio ni havis unusolan ekzamenon en La Chaux-de-Fonds (Svislando), en la lernejo Granda Ursino, kie 4 lernantoj trapasis ekzamenojn je B1 kaj B2 niveloj. La ekzamenon organizis surloke Mónika Molnár, la parolajn ekzamenojn okazigis Katalin Kováts kaj Ilona Koutny.
 |
 |
La aliajn sesiojn ni ŝovis al novembra dato kaj la plimulto de la ekzamenlokoj konfirmis la pretecon ankaŭ en tiu tempo kunlabori.
Eble estas ankoraŭ aliaj lokoj, kiuj volas okazigi sesion la 28an de novembro. Tiuj lokoj povas peti sesion per la formularo.
Aliĝi al la jam lanĉitaj sesioj eblas en la ekzamenpaĝo: https://edukado.net/ekzamenoj/ker/sesioj
La ekzamenkomisiono de UEA kune kun la budapeŝta ekzamencentro ORIGO, nuntempe laboras pri nova formo de la ekzamenoj, nome pri la komplete reta ekzameniĝeblo, kio signifos, ke eble jam ĉi-jare, sed certe ekde 2021 eblos trapasi ekzamenojn ankaŭ el propra hejmo. Por tio necesas, ke la kandidatoj havu la teknikajn ilojn, bonan retkonekton kaj plenumu ĉiujn aliajn postulojn. Pri la detaloj de la nova ekzamenformo Katalin Kovats planas paroli dum la virtualaj someraj aranĝoj, ekzemple en aparta sesio de la kongresa programo: KLERIGA LUNDO.
| ← Rekorda monato en Ekparolu! | Al la listo | Programoj kaj ebloj dum la pandemio → |
