Gastolibro

Feliĉan la 20an datrevenon de Edukado.net ! Espereble la retejo daŭros ĉiam en la estonteco.

gratulojn !! dankon !!!

Edukado.net estas mirinda ! Por mi kiel ankoraŭ nova esperantistino ĝi estis - kaj estos - tre valora helpo ! La parolado kun la onkloj kaj onklinoj nur estas unu ekzemplo. La trafajn ekzercojn kelkfoje estas malfacile trovi; eble la serĉado povus esti ampleksigota iomete ? Unufoje trovitaj, ili helpas al mi, kiam mi mem nun instruas komencantojn. Laŭ mi, la tuta sistemo devas resti, kia ĝi estas ! Mi vere tristiĝus, se la retpaĝo ne plu ekzistus. Mi kore gratulas vin, Katalin, pro via grandega laboro dum la jaroj ;-)

Malofte mi vizitas edukado.net, tamen mi ofte pensas pri ĝi kaj la valora laboro de Katalin K. Mi nun instigas nin ĉiujn pruvi nian aprezadon per mona gratulo al edukado.net, por ke ĝi povu rejuniĝi, poliboniĝi kaj daŭrigi sian helpadon al la instruado. Sukceson kaj dankon al ĉiuj instruintoj, -antoj, -ontoj kaj -istoj. Kuraĝon kaj progreson al ĉiuj lernantoj. Ni ne perdu esperon. Unu el la ecoj de Esperanto estas, ke ĝi vivtenas ĝuste esperon. Bonan jaron 2022 al ĉiuj!

Ne estas vortoj por priskribi la meritojn de Katalin, la kreinto kaj prizorgantino de edukado.net. Ĉu temas pri ekzercoj, ĉu temas pri klarigoj, ĉu temas pri filmoj, ĉu temas pri novaj ideoj kaj programoj kiel RISKO kaj EKPAROLU, ĉio kongruas kun la bezonoj de la lernantoj kaj de la instruistoj. Stimuli, kuraĝigi, subteni, klarigi, jen la manieroj de Katalin por lernigi nin. Nemalhavebla ilo estas edukado.net. Bravo Katalin! Gratulojn kaj dankon!

Mi elkore gratulas la 20-jariĝon de edukado.net. Jes, vere en la interreta mondo ĝi jam atingis maljuniĝon. Sed mi esperas, ke ĝi daŭre restu en vigla juneco~
Ĉi tie en Ĉinio estas malfacile eniri Guglon kaj Jutubon, kaj tial mi ne povas plenigi la enketion bedaŭrinde. Ĉiukaze mi denove gratulas la 20-an datrevenon de Vi, kaj elkore esperas daŭran viglecon en la estonteco~~

Kiam komence de 2017 mi eklernis Esperanton kaj rapide trairis la kurson ĉe Duolingo, mi ankaŭ utiligis la eblon partopreni en 'Ekparolu' kaj tiel miaj scioj pri la lingvo, ĝiaj komunumo kaj kulturo draste plivastiĝis. Kiam taŭgaj personoj helpas al vi kompreni Esperantujon, vi pli kuraĝos paŝeti en tiun verdan mondon.
Ĉi tie mi trovis la informojn pri la KER-ekzameno, kiun mi decidis trapasi, nur monatojn post eklernado, je nivelo B2.

Duonjaro poste mi fariĝis volontulo por la Bjalistoka Esperanto-Societo kaj dum naŭ monatoj, sub gvidado de spertaj instruistoj de Esperanto, mi preparis kaj (kun)gvidis lecionojn de Esperanto.
Krom la helpo de surlokaj spertuloj, utilis al mi la Manlibro pri Instruado de Esperanto, kaj grandan rolon ludis la instrumaterialoj troveblaj ĉe edukado.net; troveblas ekzercoj de ĉiaj tipoj je ĉiuj niveloj. Valoras legi la komentojn kaj konsilojn de aliaj instruistoj: preskaŭ ĉiam kiam ni instruas, ni ankaŭ ion lernas kion ni povos kunhavigi por ke aliaj lernu de niaj spertoj.

Mi kore dankas al Katalin Kováts, sen kiu mia esperanta vivo aspektus tute alie.

en ordo.

amike

renato

Dankon, Renato pro viaj komento kaj konsilo. Mi sentas la neceson reagi ĉi tie.
Edukado.net faras multon por ILEI kaj la instruistoj tutmonde. Ni bone kunlaboris dum la tempo, kiam Mireille Grosjean estis prezidanto.
Mi kiel redaktoro per pli ol jara laboro redaktis la Manlibron kaj kompilis por ĝi preskaŭ cent artikolojn. La libron ILEI (kun)eldonis kaj havas, vendis. Mi gvidis seminarion pri ĝi, prelegis dum la kongresoj plurfoje kaj partoprenis diskutrondojn, ĉeestis vive plurajn kongresojn kaj helpis, mi regule kontribuas aŭ kunlaboras kun IPR, kreiĝis koncepto de 'oraj membroj' kiuj havus avantaĝon en la retejo, en la FORUMO mi kreis apartan fermitan parton por diskutoj de ILEI. Edukado.net akceptas komunikaĵojn de ILEI kaj anoncas ilin, sed preferus rekte ricevi ilin kun peto je tia plukomunikado.
Vidu la lastan raporton de la nova estraro. La retejo eĉ ne aperas inter la pluperfektigaj projektoj aŭ kunlaborplanoj ene de la movadaj instancoj.
Prioritato por edukado.net daŭre estos la servo kaj helpo al la instruantoj, tio estas kion mi, la redaktoro, povas promesi.

Mi rekomendus plian integriĝon kaj kunlaboron kun ILEI